مطمئین؛ د هر ډول فساد پر وړاندې جدي یم
کابل کې د المپیک ملي کمېټې او ورزش ریاست له لوري ولایتي مسؤلینو ته د ظرفیت لوړونې په برخه کې درې ورځنی سمینار ورکړل شو.
یاد سمینار چې د شنبې په ورځ پیل شوی و، د هیواد د ټولو ولایتونو ورزشي مسؤلینو په کې ګډون کړی و، نن یادو مسؤلینو ته د سندونو په ورکړې پای ته ورسېد.
په دې سمینار کې ولایتي مسؤلینو ته په اداري، ورزشي او همدارنګه بېلابېلو نورو برخو کې د ظرفیت لوړونې به برخه کې روزنیز سمینار ورکړل شو.
د دې سمینار د پای په مراسمو کې د المپیک ملي کمېټې او ورزش رئیس نظر محمد مطمئین وویل: د هر ډول فساد پر وړاندې جدي یم او په خبره یې هر ډول حساب ورکولو ته تیار یم او له ټولو مسؤلینو د حساب غوښتنکی هم یم.
ښاغلي مطمئین ولایتي مسؤلسینو ته په خطاب کې وویل: هڅه وکړئ ورزشکارانو ته په فکري او شعوري ډول د وطندوستۍ احساس ورکړئ.
نوموړي زیاته کړه: په ګډه به هڅه کوو چې ورزش خلکو ته داسې ور ورپېژنو چې دلته د قوم پرستۍ او سمت پالنې په نوم کوم څه نشته او ټول یو موټی یو او په ګډه د هیواد له پاره کار کوو.
د المپیک ملي کمېټې او ورزش رئیس ولایتي مسؤلینو او ورزشکارانو ته یو ځل بیا د هر ډول همکارۍ ژمنه ورکړه او زیاته یې کړه د هر ډول ممکنه همکارۍ په برخه کې به ځان نه درېغوي.
نوموړي پر ولایتي مسؤلینو غږ وکړ چې د رئیس الوزرا له سیاسي مرستیال مولوي عبدالکبیر سره یې د ورزش په برخه کې بېلابېلې ناستې درلودې چې د هغوی به لوري هم ورته د هر ډول همکارۍ او ملاتړ ډاډ ورکړل شوی.
د المپیک ملي کمېټې او ورزش مرستیال باور هوتک وویل: هغه کړنې چې په تېرو شلو کلنو کې یې زموږ ورزش ټکنی کړی و باید جدي پام ورته وشي او بیا تکرار نه شي.
ښاغلي هوتک زیاته کړه: د کارونو د لا ښه پراختیا او پرمختګ له پاره دې د ولایتو په کچه د فدراسیونو تر منځ همانګي او همغږي رامنځته شي.
نوموړي همدارنګه وویل: د ورزشکارانو له پاره به داسې چانس برابرو چې د ولایتونو لوبغاړي به په فدراسیونو او ملي لوبډلو کې ځایونه خپلوي.
یاده دې وي چې دا سمینار درې ورځې وړاندې پیل شوی و او د المپیک ملپ کمېټې او ورزش مسؤلین ژمنه کوي چې په راتلونکي کې به هم ورته پروګرامونه جوړوي.
