د بدني روزنې او ورزش عمومي رئیس د ولایتونو له استازو سره وکتل
د المپیک ملي کمېټې او ورزش رئیس انجنیر نظرمحمد مطمئن نن سهار په خپل د کار په دفتر کې د ولایتونو د ورزش له مسوولینو سره وکتل.
په پیل کې ښاغلي مطمئن په کابل کې د ورزش علمي او ښوونیز سمینار ته د ولایاتو استازو ته ښه راغلاست ووایه او ویې ویل، دا د خوښۍ او ویاړ ځای دی چې د ورزش مسوولین د سولې او ارامۍ په فضا کې سره راټول شوي دي.
نظرمحمد مطمئن په ولایتونو کې د ورزش مسوولینو ته د وینا پر مهال وویل چې د ورزش مرکزي اداره ستاسو ټولې چارې ارزوي او د ځنډ او غفلت په صورت کې به له قانون سره سم له تاسو چلند کوي.
په هغو ولایتونو کې چې تاسو د ورزش ریاست مسؤل او استازی یاست، په مرکز او ولایتونو کې باید د ورزشکارانو لپاره ټول امکانات په کار واچول شي او ورزشي جمنازیومونه باید د ورزشکارانو په واک کې وي او د شخصي استفادې لپاره باید ونه کارول شي.
ښاغلي مطمئن ولایتي سفرونو ته اشاره وکړه او زیاته یې کړه، چې د بدني روزنې او ورزش عمومي ریاست رهبري په پلان کې لري، چې ټولو ولایتونو ته سفرونه وکړي او په ولایتونو کې د ورزش وضعیت وارزوي هغه زياته کړه، چې ټول ولايت دې له پلان سره سم خپل کاري پلان ترتيب کړي او له شته بوديجې څخه ورزشي پروګرامونه ترسره کړي تر څو د یادې بودجې څخه په وخت استفاده وشي. او سپارښتنه یې و کړه چې ټول ورزشي پروګرامونه د ولایت د اطلاعاتو او کلتور ریاست او د پوهنې ریاست په همغږي کې ترسره شي .
د ورزشکار د حق ترلاسه کول زموږ د ټولو دیني او وجداني دنده ده او باید د دې حق د ترلاسه کولو لپاره هڅه وکړو، د ټولو خیالي ورزشکارانو چې په عصریه کې شامل دي مخنیوی وشي او د ورزشکارانو چې عصریې کې شامل وي یو جدول چمتو کړئ او مرکز ته یې واستوئ. په دې کار سره به خیالي ورزشکاران له اصلي لوبغاړو څخه جلا کیږي او د دوی عصریې پیسې به اجرا کیږي.
ښاغلي مطمئن د ولایتونو په ټولو ورزشي استازو غږ وکړ چې د ورزشي فدراسیونونو سره مستقیم تماس ولري او د هغوی ټول پروګرامونه او فعالیتونه د رسنیو له لارې منعکس کړي.
د غوندې په وروستیو کې د المپیک ملي کمیټې او ورزش رئیس انجنیر نظرمحمد مطمئن په ولایاتو کې د ورزش له مسؤلینو سره د هر راز همکارۍ ژمنه وکړه او زیاته یې کړه چې ستاسو ټولو ستونزو ته به پاملرنه وشي او هر هغه ستونزه چې د ورزشکارانو په لاره کې خنډ وي باید حل شي.
