د افغانستان د اتلانو لیګ کلپونو ته د جواز ورکولو مراسم د فوټبال فدراسیون کې ترسره شول
د فوټبال فدراسیون نن یکشنبه د سلواغې په ۱۷ مه د افغانستان د فوټبال فدراسیون په مرکزي دفتر کې دا مراسم ترسره کړل.
دغه پروګرام د بدني روزنې او ورزش عمومي رياست د المپیک ملي کمیټې او د فوتبال فدراسیون د رهبرۍ له خوا د پلازمېنې، کندهار، فارياب، هلمند، کابل، لغمان، فراه، کندز، پروان، خوست، سرپل هرات او تخار ولايتونو کې د کلپونو مسوولينو ته د فعاليت جوازونو د وېش په موخه ترسر شو.
په دې مراسمو کې د بدني روزنې او ورزش عمومي ریاست او د المپیک د ملي کمېټې سرپرست نظر محمد مطمین هم حضور درلود او یادونه یې وکړه چې د خوښۍ ځای دی چې موږ ټولو د افغانستان د ورزش لپاره ګټور او ارزښتناک ګامونه پورته کړي دي او هیله یې څرګنده کړه چې په نږدې راتلونکې کې دا ګامونه به نور هم چټک شي.
ښاغلي مطمین زیاته کړه موږ د هیواد دننه او بهر ټولو ورزشکارانو ته درناوی کوو او هڅه کوو چې په خپل ډګر کې د اړو لوبغاړو سره مرسته او همکاري وکړو.
ښاغلي مطمین په مرکز او ولایتونو کې د فوټبال فدراسیون له مشرتابه او د دغه ډګر له روزونکو څخه مننه وکړه او ویې ویل چې د هېواد د فوټبال فدراسیون د راتلونکي لپاره ښه پلانونه لري.
د يادونې وړ ده، چې د هېواد د فوټبال فدراسيون څو مياشتې وړاندې په مرکز کې د اتلانو ليګ سيالۍ پيل کړې وې، خو په هېواد کې د سياسي تحولاتو له امله د دغه ليګ وځنډول شو خو تمه ده جې د یاد لیګ پاتې لوبې بيا پيل شي.
