لغمان کې د ۶ لوبډلو ترمنځ د ټېپ بال کرېکټ سیالۍ پيل شوې
د لغمان ولايت د بدني روزنې او ورزش آمريت اړوند د ټېپ بال کرېکټ فدراسیون د استازولۍ له لوري او د AWEC مؤسسې په مالي ملاتړ د ياد ولايت په مرکز مهترلام ښار کې د ۶ لوبډلو ترمنځ د ټېپ بال کرېکټ سیالۍ پيل شوې.
د يادو سياليو پيليزه لوبه د قرغيو او عليشينگ ولسواليو لوبډلو ترمنځ وشوه، د لوبې پچه عليشنګ ولسوالۍ لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۵ لوبغاړو په سوځېدو سره خپلې سيالې لوبډلې ته د ۱۵۷ منډو هدف کېښود، په ځواب کې قرغیو ولسوالۍ لوبډلې ياد هدف په ۹م اور کې ترلاسه کړ او د ۷ ویکټو په توپیر يې بريا خپله کړه.
دا سیالۍ د ځوانانو سالم مصروفیت په موخه ترسره کېږي، چې ۵ ورځې به دوام ومومي.
