د فوټبال پنځلسو روزونکو ته د فوټبال لایسنس D درجې روزنیز کورس پیل شو
د هېواد د المپیک، بدني روزنې او ورزش عمومي ریاست په همکارۍ د فوټبال ملي فدراسیون د استازولۍ له لوري د کابل ښار د فوټبال لوبډلو پنځلسو روزونکو ته د فوټبال لایسنس D درجې روزنیز کورس پیل شو، چې يوه اوونۍ به دوام وکړي.
دغه روزنيز کورس د کورنیو استاذانو رسول احمدي او اميد عظيمي تر نظارت لاندې پيل شوی، چې روزونکو ته به پکې د فوټبال لومړي او اساسي موضوعات په نظري او عملي ډول تدريس شي.
د ياد روزنيز کورس موخه د فوټبال بنسټيزو اصولو او مفاهیمو سره د روزونکو بلدتيا او د روزونکو تخنيکي لوړتیا لوړول دي.
د کورس په پای کې به د فوټبال ملي فدراسیون له لوري ګډون کوونکو روزونکو ته د فوټبال لایسنس D درجې رسمي سندونه ورکړل شي.
