د زابل ولایت د بدني روزنې او ورزش امریت د ۱۴۰۴ لمریز کال د ورزشي فعالیتونو لنډ کلنی راپور
د زابل ولایت د بدني روزنې او ورزش امریت د ورزش د ودې او پراختیا لپاره په ۱۴۰۴ هـ. ل کال کې د پام وړ ورزشي فعالیتونه ترسره کړي دي.
د دې ولایت خلک له ورزش سره زیاته مینه لري، چې تل یې د یاد ولایت په مرکز او ولسوالیو کې د بدني روزنې او ورزش امریت او بېلابېلو فدراسیونونو په همکارۍ او لارښوونه په مختلفو مناسبتونو کې ورزشي برنامې ترسره کړې دي او د خلکو لپاره یې د غوره تفرېح زمینه مساعده کړې ده.
په ټوله کې په یاد ولایت کې اوس مهال د مختلفو څانګو ۱۸ فدراسیونونه فعالیت لري. د دې ترڅنګ پکې ۲۰ کلبونه فعاله دي او ۳۳۰۰ ورزشکاران پکې پر ورزش بوخت دي.
د زابل ولایت د بدني روزنې او ورزش امریت اړوند د مختلفو فدراسیونونو د استازولیو له لوري په مرکز او ولسوالیو کې سږ کال ۲۰۲ لویې او وړې ورزشي برنامې ترسره شوې دي، چې ۸۰ یې په مرکز او ۱۲۲ یې په ولسوالیو کې ترسره شوې دي.
د دغه ولایت ورزشي امریت له لوري د روزونکو، لوبڅارانو او ورزشکارانو د ظرفیت لوړنې په موخه د کراټې، پاورلفتنګ او نیوفولکانټاکټ، فدراسیونونو په برخه کې ۹۵ کسانو ته د ظرفیت لوړونې سمینارونه ورکړل شوي دي.
په ټوله کې په دغه ولایت کې لویې او وړې ورزشي برنامې جوړې شوې دي، چې له جملې یې په مرکز قلات کې د ۶۰ ورزشکارانو له خوا د افغانستان د خپلواکۍ په ویاړ د جشنوارې جوړل و، همداراز د زمري میاشتې په ۱۲مه د اتو ولایتونو ترمنځ د کیک بوکسنګ سیالیو ترسره کول وو، چې زابل پکې لومړی مقام خپل کړ، په مرکز قلات ښار کې د زمري په ۴مه د ۱۱ ولایتونو د ورزشکارانو ترمنځ د کیک جیتسو لویې سیالۍ وشوې، چې د زابل ولایت په بریا پای ته ورسېدې. د دې ترڅنګ د فوټبال، والیبال، اتلتیک، نیو فولکانټاکټ، نېزه وهنې او محلي غېږ نیونې لویې ورزشي برنامې ترسره شوې دي، چې زرګونه کسانو پکې ګډون کړی دی.
له دغه ولایت څخه په ۱۴۰۴ هـ.ل کال کې په ملي او ټاکنیزو سیالو کې ۲۸ ورزشکارانو ګډون کړی دی او ۲ ورزشکاران ملي لوبډلو ته ټاکل شوي دي.
