د کابل فوټسال غوره لیګ اووم پړاو سیالۍ د " دلاور زاده دره ترکمن " لوبډلې په اتلولۍ پای ته ورسېدې
د المپيک، بدني روزنې او ورزش عمومي ریاست اړوند د فوټبال ملي فدراسیون د فوټسال کمېټې له لوري د يوولسو لوبډلو ترمنځ د کابل فوټسال غوره لیګ اووم پړاو سیالۍ د دلاور زاده دره ترکمن لوبډلې په اتلولۍ پای ته ورسېدې.
د دغو سياليو د پای په مراسمو کې د المپيک، بدني روزنې او ورزش عمومي رياست فني او مسلکي مرستيال او د فوټبال ملي فدراسیون معاون حافظ احمد جان ځدران، د فوټبال ملي فدراسيون رئيس محمد يوسف کارګر، د ياد رياست ورزشي مشاور قاري حيات الله رحماني، د فوټسال کمېټې مرستیال حاجي فرید یوسفزي، ورزشکارانو او د فوټسال ورزش ګڼو مینوالو ګډون کړی و.
دغه سيالۍ چې د ليګ په شکل نږدې مياشت وړاندې پيل شوې وې، په پايله کې دلاور زاده دره ترکمن لوبډلې د ۲۱ زياتو امتيازونو په ترلاسه کولو سره لومړی او شقايق لوبډلې د ۱۹ امتيازونو په ترلاسه کولو سره دويم مقام خپل کړ.
د يادونې وړ ده چې د دغو سياليو د پای په مراسمو کې غوره لوبڅارانو او روزونکو ته ستاينليکونه، غوره لوبغاړو ته مډالونه او اتلې لوبډلې ته د اتلولۍ کپ ورکړل شو.
هېره دې نه وي چې د دغو سياليو موخه د هيواد په کچه د غوره لوبغاړو موندل او د زون په کچه د فوټسال سياليو لپاره د غوره لوبډلو ټاکل دي.
