د يما پطرول افغانستان وزلوبې اووم پړاو ليګ پايلوبې ته بدخشان او سرپل ولايت لوبډلو لار ومونده
د هېواد المپيک، بدني روزنې او ورزش عمومي رياست په همکارۍ، د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول - افغانستان وزلوبې اووم پړاو ليگ پر لسمه ورځ بدخشان او سرپل لوبډلو برياوې خپلې کړې او پايلوبې ته يې لار ومونده.
د دغو سياليو پر لسمه ورځ لومړۍ لوبه د بدخشان او بغلان لوبډلو ترمنځ وشوه، چې په پايله کې بدخشان لوبډلې خپلې سیالې بغلان لوبډلې ته د ۳-۱ دوه امتيازونو په توپير ماتې ورکړه او پايلوبې ته يې لار ومونده، همدا راز په دويمه لوبه کې سرپل ولايت لوبډلې خپلې سيالې کندز لوبډلې ته ۹-۲ اووه امتيازونو په توپير ماتې ورکړه او پايلوبې ته يې لار ومونده.
د ويلو ده، چې د يما پطرول افغانستان وزلوبې اووم پړاو ليگ د بهرنيو چاپندازانو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ لس ورځې وړاندې پيل شو او سبا لس بجې به يې پايلوبه د بدخشان او سرپل ولايتونو د لوبډلو ترمنځ ترسره شي.
