هلمند کې د پنځو لوبډلو ترمنځ د ټېپ بال کرېکټ سيالۍ پيل شوې
د هلمند ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د مرکز لښکرگاه ښار په ملت لوبغالي کې د پنځو لوبډلو ترمنځ د "هلمند اتلانو ليگ" په نوم د ټېپ بال کرېکټ گروپي سيالۍ پيل شوې.
د دغو سياليو پايلوبه د هلمند منتخبې او هلمند الف لوبډلو ترمنځ ترسره شوه. د لوبې پچه هلمند منتخبې لوبډلې وگټله او لومړی يې توپ وهنې پرېکړه وکړه، چې په ټاکلو لسو اورونو کې يې د پنځو لوبغاړو په سوځېدو سره خپلې سيالې لوبډلې ته د ۱۳۰ منډو هدف وټاکه، په مقابل کې هلمند الف لوبډلې ياد هدف د لوبې په وروستي اور کې ترلاسه کړ او سيالي يې د شپږو ویکټو په توپير وگټله.
د يادو سياليو موخه د لوبغاړو ترمنځ همغږي رامنځته کول او ورزش ته د ځوانانو هڅول دي، چې يوه اوونۍ به دوام وکړي.
