پکتیکا؛ ارگون ولسوالۍ کې د ۲۴ لوبډلو ترمنځ د ټېپ بال کرېکټ سيالۍ پای ته ورسېدې
د پکتيکا ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ياد ولايت په ارگون ولسوالۍ کې د ۲۴ لوبډلو ترمنځ د ټېپ بال کرېکټ سيالۍ، چې ۱۷ ورځې مخکې پيل شوې وې د هاشم آباد لوبډلې په اتلولۍ پای ته ورسېدې.
د دغو سياليو پايلوبه د هاشم آباد او عادل کلب لوبډلو ترمنځ ترسره شوه. د لوبې پچه عادل کلب لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د شپږو لوبغاړو په سوځېدو سره خپلې سيالې لوبډلې ته د ۱۰۱ منډو هدف وټاکه، په مقابل کې هاشم آباد لوبډلې ياد هدف په نهم اور کې ترلاسه کړ او سيالي يې د پنځو ویکټو په توپير وگټله.
د يادو سياليو موخه د ټېپ بال کرېکټ لوبې ته وده ورکول او د ځوانانو لپاره د سالمې تفريح برابرول وو.
