کابل کې د اتو کلپونو ترمنځ د جو جيتسو ټورنمنټي سيالۍ ترسره شوې
د المپيک، بدني روزنې او ورزش عمومي رياست په همکارۍ د جو جيتسو ملي فدراسيون له لوري د کابل ۸ غوره کلپونو څخه د ۴۰ ورزشکارانو ترمنځ د ( اتم د ثور ټورنمنټي سياليو ) تر نامه لاندې د جو جيتسو مناسبتي سيالۍ، د دې رياست په ۵۰۰ کسيز جمنازيوم کې ترسره شوې.
په دې سياليو کې د کابل ولايت د اتو کلپونو ( عاطفيان، طلوع پيروزي، نيرو، موج قدرت، استاد مسلم، ميلاد نور، جوانان هدفمند او طلوع پيروزی قلعه فتوح) څخه ۴۰ ورزشکارانو په څلورو عمري کټګوريو ( کوچنيانو، نوي ځوانانو، ځوانانو او لويانو ) کې او له ۳۰- تر ۶۹- بېلابېلو وزني کټګوريو کې د يو بل پر وړاندې سيالۍ ترسره کړې.
د دې سياليو په پایله کې ۷ لوبغاړو د خپلو سيالانو په ماتولو سره لومړي مقامونه وګټل، چې د دې رشتي د مسوولينو له لوري ورته کپونه، مډالونه، تصديق پاڼې او نغدي جايزې ورکړل شوې.
هېره دې نه وي، چې يادې سيالۍ د اتم د ثور په مناسبت جوړې شوې وې، چې يوه ورځ يې دوام وکړ.
