کاپیسا؛ نجراب ولسوالۍ کې د ۱۶۰ ورزشکارانو ترمنځ د اشيهاراکراټې سیالۍ پای ته ورسېدې
د کاپیسا ولایت د بدني روزنې او ورزش امریت اړوند د اشيهاراکراټې ملي فدراسیون د استازولۍ له لوري د یاد ولایت په نجراب ولسوالۍ کې له څلورو ولسوالیو د ۱۶۰ ورزشکارانو ترمنځ د اشيهاراکراټې سیالۍ پای ته ورسېدې.
په دغو سیالیو کې د مرکز، نجراب، د کوهستان حصه اول او د کوهستان حصه دوم ولسوالیو ورزشکارانو په تنکیو ځوانانو، نویو ځوانانو، ځوانانو او د لویانو ورزشکارانو په عمري کټګوریو کې ګډون کړی وو، چې په پایله کې د مرکز لوبډلې د ۱۱۲ امتیازونو په ترلاسه کولو لومړی، کوهستان حصه دوم ولسوالۍ لوبډلې د ۷۰ امتیازونو په ترلاسه کولو دویم او د نجراب ولسوالۍ ورزشکارانو د ۵۶ امتیازونو په ترلاسه کولو سره بیا درېیم مقام خپل کړ.
د یادو سیالیو موخه د اشيهاراکراټې ورزش ته وده ورکول او د غوره ورزشکارانو موندل و، چې دوې ورځې یې دوام وکړ.
د سیالیو په پای کې غوره ورزشکارانو ته مډالونه او د اتلولۍ حکمونه ورکړل شول.
