غور کې د فوټسال سوپر کپ سیالۍ د آرین موټر سیکلټ لوبډلې په اتلولي پای ته ورسېدې
د غور ولایت د بدني روزنې او ورزش امریت اړوند د فوټبال فدراسیون د استازولۍ له لوري د ياد ولايت مرکز فېروز کوه ښار کې د ١٢ لوبډلو ترمنځ د فوټسال سوپر کپ سیالۍ د آرین موټر سیکلټ لوبډلې په اتلولي پای ته ورسېدې.
د دغو سیالیو پایلوبه د آرين موټر سیکلټ او باران لوبډلو ترمنځ ترسره شوه، چې په پايله کې یې آرين موټر سیکلټ لوبډلې د ٤/٣ ګولونو په توپیر خپلې سیالې لوبډلې ته ماتې ورکړه او اتلولي یې وګټله.
د سیالیو په پای کې د باران لوبډلې لوبغاړی فضل احمد نوري د ٣۵ ګولونو په ترسره کولو غوره ګول وهونکی، د آرين موټر سیکلټ لوبډلې لوبغاړی فرهاد ظفري غوره لوبغاړی او امان الله غوره ګول ساتونکي ونومول شو.
دا سیالۍ د فوټسال لوبې ته د ودې ورکولو په موخه ترسره شوې، چې درې اوونۍ یې دوام وکړ.
