ننگرهار؛ اچين ولسوالۍ کې د ۶۴ لوبډلو ترمنځ د ټېپ بال کرېکټ سيالۍ پای ته ورسېدې
د ننگرهار ولايت د بدني روزنې او ورزش رياست اړوند د شينوارو شپږگونو ولسواليو ورزشي مدريت له لوري د ياد ولايت په اچين ولسوالۍ کې د ۶۴ لوبډلو ترمنځ د ااا له نظام څخه د ملاټر په موخه د ټېپ بال کرېکټ سيالۍ، چې ۳۶ ورځې مخکې پيل شوې وې د دېسرک سوپر سټار لوبډلې په اتلولۍ پای ته ورسېدې.
د يادو سياليو پايلوبه د دېسرک سوپر سټار او دوسرکې مينوال لوبډلو ترمنځ ترسره شوه، دوسرکې مينوال لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د څلورو لوبغاړو په سوځیدو سره سيالې لوبډلې ته د ۱۴۴ منډو هدف ورکړه، په مقابل کې دېسرک سوپر سټار لوبډلې ياد هدف د لوبې په وروستي اور کې ترلاسه کړ او د شپږو ویکټو په توپير يې بريا په خپل نوم کړه.
د يادولو وړ ده، چې د دغو سياليو په پای کې اتلې لوبډلې ته د اتلولۍ جام او غوره لوبغاړو ته چمتو شوې ډالۍ وکړل شوې.
