هرات؛ د اس ځغلونې اووم پړاو ټاکنيزو ملي سياليو ورزشکارانو ته د اس ځغلونې سمينار ورکړل شو
د المپيک بدني روزنې او ورزش عمومي رياست اړوند د اس ځغلونې ملي فدراسيون له لوري په هرات ولايت کې د اس ځغلونې اووم پړاو ملي ټاکنيزو سياليو ورزشکارانو ته د اس ځغلونې د قانون او مقررې اړوند سمينار ورکړل شو.
دغه سيالۍ چې د هرات ولايت په کوربتوب ترسره کېږي په دوو سبکونو (يورغه او سرعتي) کې چې يورغه به په ۸۰۰ او ۱۲۰۰ متره او سرعتي به په ۸۰۰ او ۱۰۰۰ متره واټن کې نن جمعه ماسپښين دوه بجې په رسمي توګه پيل شي او يوه هفته به دوام وکړي.
تمه ده چې د دغو سياليو په پايله کې به له ۱۱ ولايتونو او ۱۵۰ اس ځغلونکو او اسونو څخه په دواړو سبکونو کې ۲۰ اسونه او ۲۰ اس ځغلونکي د هيواد په کچه د ملي لوبډلې لپاره وټاکل شي.
د يادونې وړ ده چې د يادو سيال د پيل مراسمو لپاره د المپيک بدني روزنې او ورزش عمومي رييس مولوي احمد الله وثيق، د ياد رياست فني او مسلکي معاون حافظ احمد جان ځدران، د اس ځغلونې ملي فدراسيون او د المپيکي چارو رييس دادمحمد پاينده اختري، د نوموړي رياست ورزشي مشاور قاري حيات الله رحماني، د همدې رياست ارشد مشاور ګلاب الدين خپلواک او ورسره پلاوی هم هرات ولايت ته رسېدلی دی.
