ميدان وردگ کې د ۲۴ لوبډلو ترمنځ د واليبال سيالۍ پای ته ورسېدې
د ميدان وردگ ولايت د بدني روزنې او ورزش امريت او د واليبال ملي فدراسيون په گډه همکارۍ د ياد ولايت په مرکزي جمنازيوم کې د شپږو ولایتونو د ۲۴ لوبډلو ترمنځ د ځوانانو يووالي په موخه د واليبال سيالۍ د ميدان اتلانو لوبډلې په اتلولۍ پای ته ورسېدې.
په يادو سياليو کې له کابل، کاپیسا، لوگر، ننگرهار، کونړ او کوربه میدان وردگ ولايتونو څخه لوبډلو گډون کړی وو، چې په پايلوبه يې د ميدان اتلانو او ځواک ميدان ښار لوبډلو ترمنځ ترسره شوه، چې په پايله کې ميدان اتلانو لوبډلې خپلې سيالې لوبډلې ته د ۳ پر صفر ميدانونو په توپير ماتې ورکړه او اتلولي يې په خپل نوم کړه.
د یادولو وړ ده، چې دغو سياليو پنځه ورځې دوام وکړ او په پای کې اتلې لوبډلې ته (۲۰) شل زره او د دويم مقام گټونکې لوبډلې ته (۱۰) لس زره افغانۍ د انعام په توگه ورکړل شوې.
