لوگر کې د ۶۰ ورزشکارانو ترمنځ د کيک بوکسينگ دوستانه سيالۍ ترسره شوې
د لوگر ولايت د بدني روزنې او ورزش امريت اړوند د کيک بوکسينگ فدراسيون د استازولۍ له لوري د ياد ولايت په مرکز پل علم ښار کې د پنځو کلبونو د ۶۰ ورزشکارانو ترمنځ د تنکیو ځوانانو، نويو ځوانانو او ځوانانو په عمري کټگوريو کې د کيک بوکسينگ دوستانه سيالۍ ترسره شوې.
دغه سیالۍ چې يوه ورځ يې دوام وکړ، په پايله کې باتورانو ورزشکارانو کلب لومړی، خالد به وليد ورزشکارانو کلب دويم او مهاجرين ورزشکارانو کلب بيا درېيم مقام ترلاسه کړ.
د يادونې وړ ده، چې د يادو سياليو موخه د غوره ورزشکارانو موندل او ورزش ته د ځوانانو هڅول و او په پای کې غوره ورزشکارانو ته ستاينليکونه او چمتو شوې ډالۍ ورکړل شوې.
