خوست کې د ۲۰ لوبډلو ترمنځ د ټېپ بال کرېکټ سيالۍ پای ته ورسېدې
د خوست ولايت د بدني روزنې او ورزش امريت په همکارۍ د مرکز متون ښار په پنزايي لوبغالي کې د ۲۰ لوبډلو ترمنځ د ټېپ بال کرېکټ سيالۍ، چې دوې مياشتې مخکې پيل شوې وې، د ډېنجر لوبډلې په اتلولۍ پای ته ورسېدې.
د يادو سياليو پايلوبه د ډېنجر او پنزايي زلمي لوبډلو ترمنځ ترسره شوه، چې پنزايي زلمي لوبډلې د لوبې پچې په گټلو سره په ټاکلو اتو اورونو کې د څلورو لوبغاړو په سوځېدو سره سیالې لوبډلې ته د ۱۰۶ منډو هدف وټاکه، په مقابل کې ډېنجر لوبډلې ياد هدف د لوبې په اووم اور کې ترلاسه کړ او د څلورو ویکټو په توپير يې بريا او اتلولي په خپل نوم کړه.
د یادولو وړ ده، چې د دغو سياليو په پای کې اتلې لوبډلې ته يو عراده موټرسايکل او دويم مقام گټونکې لوبډلې ته يو پسه د انعام په توگه ورکړل شو.
