بدخشان؛ ارګو ولسوالۍ کې د ۲۶ لوبډلو ترمنځ د واليبال سيالۍ پای ته ورسېدې
د بدخشان ولايت د بدني روزنې او ورزش امريت اړوند د واليبال ملي فدراسيون د استازولۍ له لوري د ياد ولايت په ارګو ولسوالۍ کې د خزاني جام په نوم د ۲۶ لوبډلو ترمنځ د واليبال سيالۍ، چې څو ورځې مخکې پیل شوې وې د کشم لوبډلې په اتلولۍ پای ته ورسېدې.
د دغو سياليو په پایلوبه کې د کشم منتخبې لوبډلې خپلې سیالې استقلال شهر لوبډلې ته د ۳/۲ ميدانونو په توپير ماتې ورکړه او اتلولي يې خپله کړه.
د يادو سياليو موخه د واليبال ورزش ته وده ورکول و.
دسياليو په پای کې د بدخشان ورزشي امريت له لوري غوره لوبغاړو ته چمتو شوې ډالۍ ورکړل شوې.
