بلخ کې د ۲۰ ورزشکارانو ترمنځ د سوک وهنې سیالۍ ترسره شوې
د بلخ ولایت د بدني روزنې او ورزش ریاست اړوند د سوک وهنې فدراسیون د استازولي له لوري د یاد ولایت په مرکز مزارشریف ښار کې د ۲۰ ورزشکارانو ترمنځ د خزاني جام په نوم د کېک بوکسېنګ سیالۍ ترسره شوې.
دغه سیالۍ د نویو ځوانانو او ځوانانو په عمري کټګوري او له د ۳۴ تر ۸۵ کیلو ګرامه بېلابېلو وزني کټګوریو کې ترسره شوې، چې لسو ورزشکارانو خپلو سیالانو ته په ماتې ورکولو سره بریاوې تر لاسه کړې.
دا سیالۍ د کېک بوکسېنګ ورزش ته د ودې ورکولو په موخه ترسره شوې، چې یوه ورځ یې دوام وکړ او په پای کې غوره ورزشکارانو ته بېلابېلې ورزشي ډالۍ، ستاینلیکونه او مډالونه ورکړل شول.
