پکتیکا؛ مرکز ښرنه کې د ۲۵ لوبډلو ترمنځ د والیبال سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت مرکز ښرنه کې د ۲۵ لوبډلو ترمنځ د والیبال سیالۍ د نوروز لوبډلې په اتلولي پای ته ورسېدې.
په دغو سیالیو کې د خوست او غزني ولایتونو لوبډلو هم ګډون کړی و، چې پایلوبه یې د نوروز او څلي لوبډلو ترمنځ ترسره شوه او په پایله کې یې نوروز لوبډلې د دوه پر صفر میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
یادې سیالۍ د والیبال لوبې ته د ودې ورکولو په موخه ترسره شوې، چې پنځه ورځې یې دوام وکړ او په پای کې لومړي مقام لوبډلې ته یو عراده موټر سایکل او نورې چمتو شوې ډالۍ ورکړل شوې.
