کندوز؛ امام صاحب ولسوالۍ کې د ٦٠ پهلوانانو ترمنځ د کورش سیالۍ ترسره شوې
د کندوز ولایت د بدني روزنې او ورزش ریاست اړوند د کورش فدراسیون د استازولي له لوري د ياد ولايت په امام صاحب ولسوالۍ کې د ٦٠ پهلوانانو ترمنځ د کورش آزادې سیالۍ ترسره شوې.
په دغو سیالیو کې د بغلان او جوزجان ولایتونو ورزش کارانو هم ګډون کړی و چې په پایله کې یې ٣٠ ورزش کارانو خپلو سیالانو ته په ماتې ورکولو سره بریاوې خپلې کړې.
يادې سیالۍ ورزش ته د ځوانانو د هڅولو او په لېرې پرتو سیمو کې د کورش دودولو په موخه ترسره شوې چې یوه ورځ یې دوام وکړ او په پای کې ګټونکو لوبغاړو ته نغدي ډالۍ ورکړل شوې.
