پکتيکا؛ په برمل ولسوالۍ کې د ۲۰ لوبډلو ترمنځ د ټېپ بال کرکټ سيالۍ پای ته ورسېدې
د پکتيکا ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د برمل ولسوالۍ په باډر سيمه کې د ۲۰ لوبډلو ترمنځ په لبرې پرتو سيمو کې ورزش ته د ودې ورکولو په موخه د ټېپ بال کرکټ سيالۍ د نار زلمي لوبډلې په اتلولۍ پای ته ورسېدې.
د يادو سياليو پايلوبه د نار زلمي او رضوان افغان لوبډلو ترمنځ ترسره شوه، رضوان افغان لوبډلې د لوبې پچې په گټلو سره په ټاکلو لسو اورونو کې د پنځو لوبغاړو په سوځېدو سره سیالې لوبډلې ته د ۱۱۸ منډو هدف کېښود، په مقابل نار زلمي لوبډلې ياد هدف په نهم اور کې ترلاسه کړ او د پنځو ويکټو په توپير يې بريا خپله کړه.
د يادونې وړ ده، چې دغو سياليو ۱۵ ورځې دوام وکړ او په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
