هلمند؛ شهيد اجمل لوبډلې د اختريز جام په نوم د فوټبال سياليو اتلولي وگټله
د هلمند ولايت د بدني روزنې او سپورټ امريت اړوند د فوټبال فدراسيون د استازولۍ له لوري د گرمسېر ولسوالۍ په هزار جفت حوزه کې د اتو لوبډلو ترمنځ د اختريز جام په نوم د فوټبال ناک اوټ سيالۍ د شهيد اجمل لوبډلې په اتلولۍ پای ته ورسېدې.
د يادو سياليو پايلوبه د شهيد اجمل او عمرزو ځوانانو لوبډلو ترمنځ ترسره شوه، چې په ټاکلي وخت سيالۍ ۰/۰ مساوي پای ته ورسېده، خو په پنالټيانو کې شهيد اجمل لوبډلې سيالې لوبډلې ته د ۲/۳ گولونو په توپير ماتې ورکړه او بريا يې خپله کړه.
دغه سیالۍ، چې يوه اوونۍ يې دوام وکړ، په پای کې لومړي او دوهم مقام گټونکو لوبډلو ته کپونه او غوره لوبغاړو ته بېلابېلې چمتو شوې ډالۍ ورکړل شوې.
