کونړ؛ بريکوټ اتلانو لوبډلې د ناړۍ ولسوالۍ د ټېپ بال کرکټ سياليو اتلولي وگټله
د کونړ ولايت د بدني روزنې او سپورټ امريت په همکارۍ د ياد ولايت په ناړۍ ولسوالۍ کې د ۲۰ لوبډلو ترمنځ د يادې ولسوالۍ منتخبې لوبډلې ته د غوره لوبغاړو ټاکلو په موخه د ټېپ بال کرکټ سيالۍ د بريکوټ اتلانو لوبډلې په اتلولۍ پای ته ورسېدې.
د يادو سياليو پايلوبه د بريکوټ اتلانو او ډانگپور پښتون لوبډلو ترمنځ ترسره شوه، ډانگپور پښتون لوبډلې د لوبې پچې په گټلو سره په ټاکلو لسو اورونو کې د شپږو لوبغاړو په سوځېدو سره سیالې لوبډلې ته د ۱۳۳ منډو هدف کېښود، بريکوټ اتلانو لوبډلې ياد هدف په نهم اور کې ترلاسه کړ او د نهو ویکټو په توپير يې بريا خپله کړه.
د يادونې وړ ده، چې د دغو سياليو په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
