کابل؛ د فوټبال فدراسیون په انګړ کې یو جومات جوړ او پرانیستل شو
د افغانستان د بدني روزنې او ورزش لوی ریاست په مرسته د فوټبال ملي فدراسیون د فوټسال کمېټې له لوري د یاد فدراسیون په انګړ کې یو جومات جوړ او پرانیستل شو.
د یاد مسجد د جوړولو چارې څه موده مخکې د فوټسال کمېټې د ټولو کارکوونکو له لوري پیل شوې وې، چې نن پای ته ورسېدې.
د دغه مسجد د پرانیستې په مراسمو کې د المپیک ملي کمېټې او بدني روزنې او ورزش لوی رئیس مولوي احمدالله وثیق، د یاد ریاست فني او مسلکي مرستیال حافظ احمد جان ځدراڼ، د المپیک ملي کمېټې اجرائیوي رئیس داد محمد پاینده اختری، د بدني روزنې او ورزش ریاست د اطلاعاتو او عامه پوهاوي رئیس اتل مشواڼي او د فوټبال فدراسیون رهبري ګډون کړی و.
د هېواد د ورزش ادارې لوی رئیس مولوي احمدالله وثیق له ټولو هغو کارکوونکو مننه وکړه چې د یاد مسجد په جوړولو کې یې مرسته کړې ده او دوی ته یې د خیر دعا وکړه.
