کابل؛ بدني روزنې او ورزش عمومي ریاست کې بېلابېلې خدماتي برنامې پیل شوې
د افغانستان د بدني روزنې او ورزش عمومي ریاست په انګړ کې د نیالګیو کښېنولو او بیا رغونې په ګډون یو شمېر خدماتي برنامې پیل شوې چې یوه میاشت به دوام وکړي.
ټاکل شوې، چې په یادو برنامو کې د یاد ریاست د انګړ په شاوخوا کې نیالګي کښېنول شي او د یاد ریاست ځینې ویجاړې شوې برخې بیا ورغول شي.
د دغې برنامې د پیل په مراسمو کې د هېواد د ورزش ادارې عمومي رئیس مولوي احمدالله وثیق، د بدني روزنې او سپورټ عمومي ریاست فني او مسلکي مرستیال حافظ احمد جان ځدراڼ، د مالي او اداري رئیس مولوي عبدالناصر هاشمي، د دعوت او ارشاد رئیس مولوي داد محمد بریال عطايي، د اطلاعاتو او عامه پوهاوي رئيس اتل مشواڼي، د یاد ریاست د خدماتو آمر احمد ناصر زاخیلي او یو شمېر کارکوونکو ګډون کړی و.
