کابل؛ د پارالمپیک کمېټې پاراتکواندو درې کسیزه لوبډله د برونزو مډال ګټلو وروسته هېواد ته راستنه شوه
د پارالمپیک کمېټې پاراتکواندو درې کسیزه لوبډله، چې د بدني روزنې او ورزش عمومي ریاست په همغږۍ د پاریس ۲۰۲۴ المپیک سهمیه کسب سیالیو د ګډون په موخه یوه اوونۍ وړاندې چین هېواد ته تللې وه د برنزو مډال له لاسته راوړلو وروسته هېواد ته راستنه شوه.
په دغو سیالیو کې د افغانستان له طرفه ابراهیم دانشي د بېلا بېلو هېوادونو پنځو سیالانو ته په ماتې ورکولو سره د پاریس ۲۰۲۴ المپیکي سهمیه کسب سیالیو کې د برنزو یو مډال په خپل نوم کړ.
د ښه راغلاست مراسمو کې د المپیک ملي کمېټې عمومي رییس مولوي احمدالله وثیق او د هېواد پاراالمپیک ملي کمېټې رهبري پلاوي ګډون کړی و.
په دغو مراسمو کې د المپیک ملي کمېټې عمومي رییس مولوي احمدالله وثیق ورزشکارانو ته د برنزو مډال ګټلو مبارکي وویله او همدارنګه یې ورزشکارانو ته د ورزش په برخه کې د نورو لاسته راوړنو هیله څرګنده کړه.
