خوست؛ محبوب کلب لوبډلې د اسماعيل خېلو مندوزيو ولسوالۍ د ټېپ بال کرکټ سياليو اتلولي وگټله
د خوست ولایت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د دې ولايت په اسماعيل خېلو مندوزيو ولسوالۍ کې د ۲۴ لوبډلو ترمنځ د ټېپ بال کرکټ ټاکنيزې سيالۍ د محبوب کلب لوبډلې په اتلولۍ پای ته ورسېدې.
د يادو سياليو پايلوبه د محبوب کلب او بهرام خېلو لوبډلو ترمنځ ترسره شوه، چې په پايله کې بهرام خېلو په ټاکلو لسو اورونو کې خپلې سيالې لوبډلې ته د ۱۳۷ منډو هدف کېښود، محبوب کلب لوبډلې ياد هدف په لسم اور کې ترلاسه کړ او د دوو ويکټو په توپير يې بريا خپله کړه.
د دغو سياليو د ترسره کېدو موخه د غورو لوبغاړو موندل وو، چې شاوخوا يوه مياشت يې دوام وکړ او په پای کې د ياد ولايت د ورزش امريت له لوري گټونکې لوبډلې ته د اتلولۍ جام او غوره لوبغاړو ته کپونه او مډالونه ورکړل شول.
