غزني؛ راهيان سعادت لوبډلې د هېواد سويل ختيځ زون د فوټسال سياليو اتلولي وگټله
د غزني ولايت د بدني روزنې او ورزش امريت اړوند د فوټبال فدراسيون د استازولۍ او د فوټسال ملي کمېټې په همکارۍ د غزني ښار په نوي عمري جمنازيوم کې د ولايتونو په کچه د درېيو لوبډلو ترمنځ د هېواد سويل ختيځ زون فوټسال سيالۍ د راهيان سعادت لوبډلې په اتلولۍ پای ته ورسېدې.
په دغو سياليو کې د لوگر، ننگرهار او کوربه غزني لوبډلو گډون کړی وو.
د يادو سياليو پايلوبه د لوگر تندر او غزني راهيان سعادت لوبډلو تر منځ ترسره شوه، چې په پايله کې غزني راهيان سعادت لوبډلې خپلې سيالې لوبډلې ته ۰/۱ گول په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د هېواد فوټسال غوره ليگ سياليو ته د غوره لوبغاړو موندل ياد شوي وو، چې درې ورځې يې دوام وکړ او په پای کې د ياد ولايت د ورزش امريت له لوري گټونکې لوبډلې ته د اتلولۍ جام او غوره لوبغاړو ته مډالونه ورکړل شول.
