هلمند؛ باباجي ولسوالۍ کې د ۱۶ لوبډلو ترمنځ د ټېپ بال کرکټ سيالۍ پيل شوې
د هلمند ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د باباجي ولسوالۍ په واشيريانو کلي کې د ۱۶ لوبډلو ترمنځ د امن په نوم د ټېپ بال کرکټ سيالۍ د ځلاند پاچا لوبډلې په بريا پيل شوې.
د يادو سياليو لومړۍ لوبه د ځلاند پاچا او هلمند بازانو لوبډلو ترمنځ ترسره شوه، چې په پايله کې ځلاند پاچا لوبډلې په ټاکلو ۱۲ اورونو کې خپلې سيالې لوبډلې ته د ۱۸۰ منډو هدف کېښود، هلمند بازانو لوبډلې ياد هدف تر لاسه نه کړ او د ۱۵ منډو په توپير يې ماته ومنله.
د دغو سياليو موخه ورزش ته د ځوانانو هڅول ښودل شوی ده، چې دوې اوونۍ به دوام وکړي.
