خوست؛ اسماعيل خېلو مندوزيو ولسوالۍ کې د درېيو کلبونو تر منځ د ITF تکواندو سيالۍ تر سره شوې
د خوست ولايت د بدني روزنې او سپورټ آمريت په استازولۍ او د اسماعيل خېلو اتلانو کلب د مسئول له لوري، د ياد ولايت په اسماعيل خېلو مندوزيو ولسوالۍ کې د درېيو کلبونو تر منځ د ۵۳ ورزشکارانو په گډون، د ITF تکواندو دوستانه سيالۍ تر سره شوې.
په يادو سياليو کې د اسماعيل خېلو اتلانو، کاروان او حېدر خېلو اتلانو کلبونو برخه اخيستې وه، چې په پايله کې د اسماعيل خېلو اتلانو کلب ۱۸، د کاروان کلب ۷ او د حېدر خېلو اتلانو کلب هم ۷ برياوې خپلې کړې.
د دغو سياليو تر سره کېدو موخه، د ورزشکارانو هڅول او د هېواد د وروستيو پرمختگونو يادول و، چې يو ورځ يې دوام وکړ.
په پای کې ورزشکارانو ته کپونه، مډالونه او چمتو شوې ډالۍ ورکړل شوې.
