کابل؛ د ورزش ادارې د نشراتو لوبډلې د رسنیو جام فوټسال سیالو اتلولي وګټله
د افغانستان د بدني روزنې او ورزش عمومي ریاست په همغږي او د فوټبال فدراسیون له لوري په پلازمېنه کابل کې د رسنیو جام په نوم د فوټسال سیالۍ چې ۱۹ ورځې مخکې د لسو لوبډلو په ګډون پیل شوې وې؛ د ورزش ادارې د نشراتو لوبډلې په اتلولۍ پای ته ورسېدې.
په دغو سیالیو کې د فوټسال کمېټې، راه فردا تلویزیون، د ورزش ادارې د نشراتو ریاست، ملي تلویزیون، ځوانان راډیو، لمر تلویزیون، طلوع تلویزیون، مشعل تلویزیون، سلام وطندار راډیو، آرزو تلویزیون او یک تلویزیون لوبډلو ګډون کړی و، چې له ګروپي سیالیو وروسته یې پای لوبه د فوټسال کمېټې او د ورزش ادارې د نشراتو ریاست لوبډلو ترمنځ ترسره شوه او په پایله کې یې د نشراتو ریاست لوبډلې فوټسال کمېټې ته د ۴/۰ ګولونو په توپیر ماتې ورکړه او اتلولي یې په خپل نوم کړه.
هېره دې نه وي، چې د دغو سیالیو د درېیم مقام لپاره د آروز ټلویزیون او طلوع ټلویزیون لوبدلو ترمنځ لوبه ترسره شوه، چې طلوع ټلویزیون سیالې لوبډلې ته د ۸/۶ ګولونو په توپیر ماتې ورکړه او په دغو سیالیو کې یې درېیم مقام خپل کړ.
د سیالیو د پای په مراسمو کې د بدني روزنې او ورزش ادارې عمومي رئیس مولوي احمدالله وثیق، د یاد ریاست فني او مسلکي مرستیال حافظ احمد جان ځدراڼ، ورزشی سلاکار قاري حیات الله رحماني، د نشراتو رئیس اتل مشواڼي، د فوټسال کمېټې مسؤولانو او د ورزش ګڼو مینوالو ګډون کړی و.
د دغو سیالیو غوره ګول ساتونکی له آرزو تلویزیون څخه نوید افضلی او غوره لوبغاړی له طلوع تلویزیون څخه حامد بهرام و نومول شول.
د یادونې وړ ده چې په پای کې د سیالیو اتلې لوبډلې ته د اتلولي کپ او غوره لوبغاړو ته چمتو شوې ډالۍ ورکړل شوې.
