د ورزشي وضعیت د ارزولو په موخه د غزني اندړو ولسوالۍ ته د المپیک ملي کمېټې او سپورټ د عمومي رئيس سفر
د المپیک ملي کمېټې او سپورټ عمومي رئيس مولوي احمدالله وثیق غزني ولایت ته د خپل سفر په ترڅ کې د یاد ولایت د ورزشي وضعیت د ارزولو په موخه دې ولایت اندړو ولسوالۍ ته سفر وکړ او هلته يې له وروزشکارانو سره تر لیدنې وروسته له نږدې د نېزه وهنې د سیالۍ ننداره هم وکړه.
د المپیک ملي کمېتې او سپورټ عمومي رئيس مولوي احمدالله وثیق سره په دې سفر کې د بدني روزنې او سپورټ عمومي ریاست ورزشي سلاکار قاري حیات الله رحماني، فني او مسلکي رئيس عبدالمومن راد، د مشورتي بورډ غړی سیدمبشر هاشمي، د غزني ولایت د اطلاعات او فرهنګ رئيس مولوي حمیدالله نثار او د غزني ولایت د بدني روزنې او سپورټ آمر حاجي بلال مجاهد هم ملتیا کوي.
د المپیک ملي کمېټې او سپورټ عمومي رئيس پر پلازمېنې سره بیره ولایتونو، ولسوالیو او کلیو ته د ورزش د رسولو په موخه د غزني ولایت د مرکز د ورزشکارانو د ستونزو اورېدلو او ورزشي وضعیت تر ازرولو وروسته د دې ولایت اندړو ولسوالۍ ته سفر وکړ او هلته يې د ورزشکارانو ستونزې، غوښتنې واورېدې او ډاډ يې څرګند کړ، چې هڅه کوي، د هیواد ټولو برخو ته په متوازن ډول ورزش ورسوي او ډېر پام به يې هغو سیمو ته وي، چې په تېر کې له پامه غورځېدلې وې.
یاده دې وي، چې د المپیک ملي کمېټې او سپورټ عمومي رئيس مولوي احمدالله وثیق غزني ولایت ته د خپل سفر پر مهال تېره ورځ د دې ولایت په مرکز علي لالا سیمه کې د تېر کال د سېلابونو او بارانونو له امله د فوټبال زیانمن شوی میدان، د بیا رغاونې له چارو وروسته یوځل بیا د شاندارو مراسمو په ترڅ کې پرانیست.
