په کابل ښار د رزمي ورزشونو ۴۶ تنو روزونکو ته د لوبڅارۍ سندونه ورکړل شول
د رزمي ورزشونو د ملي فدراسیون له لوري د کابل ښار د ام ام اې برخې ۴۶ تنو ورزشکارانو ته د لومړي ځل لپاره له یوه ورځني روزنیز سمینار وروسته، د لوبڅارۍ سندونه ورکړل شول.
په همدې مناسبت جوړه شوې غونډه ، چې د هېواد د المپیک ملي کميټې د غونډو په تالار کې ترسره شوه، د المپیک ملي کمیټې او سپورت عمومي ئیس مولوي احمدالله وثیق، فني او مسلکي مرستیال حافظ احمدجان ځدراڼ، د رزمي ورزشونو د ملي فدراسیون مشر قاري حیات الله رحماني او مسؤولینو برخه اخستې وه.
د رزمي ورزشونو ملي فدراسیون مشر قاري حیات الله رحماني یاد روزنيز سمينار د رزمي ورزشونو په برخه کې د کیفیت د تضمین او معیار جوړونې هڅه وبلله او د رزمي ورزشونو په برخه کې یې د هېواد دننه د ټولو فعالیتونو د انسجام او همغږۍ خبر ورکړ.
د ښاغلي رحماني په خبره، د رزمي ورزشونو اړوند څانګو ورزشکارانو پخوا په شیندلې او نامنظمه توګه فعالیتونه کول، د فدارسیون له جوړیدو سره د دې برخې ټول فعالیتونه همغږي، د یوه واحد آدرس او رهبري له لوري په مخ وړل کیږي.
په دې رورنیز سیمینار کې ټولو ۶۰ تنو ورزشکارانو برخه اخیستې وه چې ۴۶ تنو یې له نظري او عملي آزموینو وروسته د لوبڅارۍ اسناد ترلاسه کړل او پاتې ۱۴ تنو نورو دویم پړاو ته لاره پیدا کړه.
دغه روزنیز سمینار د رزمي ورزشونو د سکرتر جنرال شاکر صابري او د لوبڅارانو کمېټې د مشر حامد صدیقي له لوري ورکړل شوی.
