په کابل کې د ۱۲۰ ورزشکارانو ترمنځ د جمناستیک هنري سیالۍ ترسره شوې
په کابل کې د المپیک ملي کمېټې او سپورټ عمومي ریاست اړوند جمناستیک فدراسیون له لوري د یاد ریاست په ۵۰۰ کسیز جمنازیوم کې له ۱۷ کلبونو څخه په څلورو کټګوریو( کم عمره ځوانانو، تنکیو ځوانانو، ځوانانو او لویانو) د ۱۲۹ ورزشکارانو ترمنځ د جمناستیک هنري سیالۍ ترسره شوې.
د دغو سیالیو د پیل په مراسمو کې د المپیک ملي کمېټې او سپورټ عمومي ریاست د مالي او اداري چارو سرپرست مولوي محمدالله احساس، د پلان او پالیسۍ سلاکار ګلاب الدین خپلواک، د المپیک ملي کمېټې معاون باور هوتک، د سپورټ ریاست د نشراتو او عامه پوهاوي رییس الله محمد اتل مشواڼی ، د کابل د برېښنا رئیس حکمت الله اخندزاده، د جمناستیک فدراسیون مسوولینو او ګڼ شمېر ورزشکارانو ګډون کړی و.
د سیالیو په پیل کې د المپیک ملي کمېټې او سپورټ عمومي ریاست د مالي او اداري چارو سرپرست مولوي محمدالله احساس ګډونوالو ته د ښه راغلاست ترڅنګ زیاته کړه: د دې ترڅنګ چې جمناستیک فدراسیون خپل جمنازیوم لا نه لري، خو بیا یې هم خپله وړتیا ښودلې او ښه ثابت شوی دی، ده وویل چې هڅه کوو ستونزو ته یې رسیدګي وکړو او ستونزې یې حل کړو. ښاغلي احساس همداراز په تېر یوه نیم کال کې د ورزش په سرعت هم خبرې وکړې چې په چټکۍ سره له مرکز څخه ولایتونو او له ولایتونو څخه ولسوالیو ان تر کلیو پورې رسېدلی دی. ده همداراز په ورزشي برخه کې د ځینو کمیو په اړه هم وویل چې د یو لړ ستونزو له امله ورته رسیدګي نه ده شوې، خو په راتلونکې کې یې هیله وښوده چې ورته ستونزې به حل او په ورزشي برخه کې اسانتیاوې رامنځته کړو.
د دې سیالیو موخه ورزش ته د ځوانانو هڅول او همدارنګه په راتلونکي کې د ملي سیالیو لپاره د ورزشکارانو چمتووالی و، چې لومړی مقام یې ABC کلب، دویم مقام د چهاردهي ځوانانو کلب، درېیم مقام لویې پکتیا کلب او څلورم مقام معروف سلطاني کلب ترلاسه کړ.
د یادونې وړ ده چې دغه سیالۍ د کابل په کچه له ۱۷ کلبونو څخه په څلورو کټګوریو کې د ۱۲۰ ورزشکارانو ترمنځ د یوې ورځې لپاره ترسره شوې.
په پای کې د ورزشي مسولینو له لوري غوره ورزشکارانو ته کپونه، مډالونه او ستاینلیکونه ورکړل شول.
