تخار کې د والیبال ژمنۍ سیالۍ د اق مسجد لېسې په اتلولۍ پای ته ورسېدې
په تخار ولایت کې د یو شمېر ولسوالیو په ګډون د ۱۴ غوره لوبډلو ترمنځ د والیبال ژمنۍ سیالۍ چې درې ورځې وړاندې د لیګ په څیر پیل شوې وې د اق مسجد لېسې په اتلولۍ پای ته ورسېدې.
دا سیالۍ چې د تخار ولایت د بدني روزنې او ورزش امریت په ملاتړ د والیبال فدراسیون له خوا د ورزشي مسوولینو په شتون کې د یاد ولایت مرکز تالقانو په جمنازیم کې پیل شوې وې درې ورځې یې دوام وکړ.
د دې سیالیو پای لوبې ته " اق مسجد لېسه او خواجه غار ولسوالۍ" لوبډلو لار موندلې وه چې د اق مسجد لېسې په اتلولۍ او د خواجه غار په دویم مقام پای ته ورسېدې.
دا سیالۍ چې په درې ګروپونو کې په حذفي توګه ترسره شوې موخه یې د ځوانانو هڅول، ورزشکارانو ترمنځ همغږي او د ولایت په کچه د والیبال سیالیو وده ښودل شوې وه.
د مراسمو په پای کې ګټونکې لوبډلې ته کپ او غوره لوبغاړو ته مډالونه او نورې جایزې ورکړل شوې.
باید وویل شي چې د لیګ د اخلاقو کپ د دشت قلعه ولسوالۍ لوبډلې خپل کړ.
