د هېواد د المپيک ملي کمېټې او سپورټ عمومي رئيس په کندز کې د بېلابېلو ورزشي رشتو له مسوولینو او ورزشکارانو سره وکتل
د المپيک ملي کمېټې او سپورټ عمومي رئيس انجنير نظر محمد مطمئن نن سهار د کندز ولايت د بېلابېلو فدراسيونونو له مسوولینو او ورزشکارانو سره وکتل.
په دې ليدنه کې لومړى د کندز بدني روزنې او ورزش رئیس دې ولايت ته د ورزش ادارې رهبرې له ورتګ څخه هرکلى وکړ او له ورزشکارانو سره يې د ورزش ادارې د هر اړخيز ملاتړ غوښتنه يې وکړه.
وروسته ورزشکارانو او د ورزشي فدراسيونونو مسوولینو جلا جلا خپلې اړتياوي او ستونزې وړاندې کړې.
همداراز ورزشکارانو او مسوولینو د رزمي ورزشونو لپاره د مجهز معياري ورزشي جمنازيوم او د ورزشي رينګ جوړولو غوښتنه هم وکړه.
ورپسې ښاغلي مطمئن د ورزش مسوولینو او ورزشکارانو ته وویل؛ د ورزش مرکزي اداره د مرکز او په ځانګړي ډول د ولايتونو ورزشکارانو ته د ښې ورزشي زمينې برابرولو او د ورزشي ځايونو رغولو ته ژمنه ده.
نوموړي زياته کړه؛ د پلان او پاليسي رياست او اړوندې برخې په داسې يوې طرحې کارکوي تر څو د ورزشي ځايونو رغولو په برخه کې د خصوصي سکتور همکاري را جلب کړي، همداراز د ورزش اداره او ملي تدارکات ورزشکارانو ته د جمنازيمونو رغولو طرحې باندې په ګډه کار کوي.
د هېواد د المپيک ملي کمېټې او سپورټ عمومي رئيس انجنير نظرمحمد مطمئن او ورسره مل پلاوي د هېواد شمالي ولايتونو ته د څو ورځني سفر په ترڅ کې د ورزش وضعیت ارزونې ترڅنګ د وزلوبي سياليو کې هم ګډون لري.
