هلمند؛ مرکز لښکرگاه کې د ۶ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د مرکز لښکرگاه ښار په بولان سيمه کې د ۶ لوبډلو ترمنځ د ټېپ بال کرېکټ سیالۍ د بارک لوبډلې په اتلولۍ پای ته ورسېدې.
د يادو سياليو پايلوبه د بارک او عبدالولي ماما لوبډلو ترمنځ وشوه، د لوبې پچه بارک لوبډلې وګټله او لومړی يې د توپ وهنې پرېکړه وکړه، چې په ټاکلو لسو اورونو کې يې خپلې سيالې لوبډلې ته د ۱۶۲ منډو هدف کېښود، په ځواب کې عبدالولي ماما لوبډلې د ټولو اورونو په لوبولو سره ۱۵۶ منډې وکړې او لوبه يې د ۶ منډو په توپير وبايلله.
دا سیالۍ د ځوانانو د سالم مصروفیت په موخه وشوې، چې ۱۱ ورځې يې دوام وکړ.
