د غزني مرکز کې د ۱۰۰ ورزشکارانو ترمنځ د فولرزم سيالۍ وشوې
د غزني ولايت د بدني روزنې او ورزش امريت اړوند د فول رزم ملي فدراسیون د استازولۍ له لوري د ياد ولايت مرکز کې د پسرلني جام په نوم له مرکز او ولسواليو څخه د ۱۰۰ ورزشکارانو ترمنځ د فول رزم سيالۍ وشوې، چې يوه ورځ يې دوام وکړ.
د دغو سياليو په پايله کې نوآباد کلب لوبډلې لومړی، ورزش کلب مرکز شهر دويم او مقر ولسوالۍ کلب درېيم مقام خپل کړ.
د يادو سياليو موخه د ورزشکارانو ترمنځ يووالی رامنځته کول او ورزش ته يې هڅول و، د سياليو په پای کې غوره ورزشکارانو ته کپونه، د اتلولۍ کمربندونه او ستاينليکونه ورکړل شول.
