د سوک وهنې پنځه کسیزه لوبډله بحرین ته لاړه
د المپیک، بدني روزنې او ورزش عمومي ریاست اړوند د سوک وهنې ملي فدراسیون درې ملي لوبغاړي او دوه روزونکي د نویو ځوانانو په آسیايي سیالیو کې د ګډون په موخه بحرین ته لاړل.
د دغو ورزشکارانو د مخې په مراسمو کې د المپیک، بدني روزنې او ورزش عمومي ریاست فني او مسلکي مرستیال حافظ احمدجان ځدراڼ، د سوک وهنې ملي فدراسیون رئیس عبدالقدیر سلطاني، ورزشکارانو او روزونکو ګډون کړی و.
د مخه ښې په دغو مراسمو کې د هېواد د ورزش ادارې فني او مسلکي مرستیال ښاغلي ځدراڼ، ورزشکاران د هېواد ریښتیني استازي وبلل او سپارښتنه یې وکړه چې هڅه دې وکړي، ترڅو په بهر کې د افغانستان ښه استازولي وکړي او نړۍ ته د افغانستان مثبت انځور وړاندې کړي. ښاغلي ځدراڼ په پای کې ورزشکارانو ته د خیر دعا وکړه.
تمه ده، چې نویو ځوانانو آسیايي سیالۍ به د روانې اکتوبر میاشتې په ۲۲مه نېټه د بحرین په کوربتوب پیل شي، چې له ۴۵ هېوادونو به ۲۰۰۰ ورزشکاران پکې ګډون وکړي.
د یادونې وړ ده، چې له افغانستان څخه هم د اتو بېلابېلو ورزشي رشتو شاوخوا ۵۰ تنه په دغو سیالیو کې ګډون کوي.
