ننګرهار؛ پچیراګام ولسوالۍ کې د ٢٠ لوبډلو ترمنځ د ټېپ بال کرېکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په پچیراګام ولسوالۍ کې د ٢٠ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د پاس صبر B او پاس صبر C ترمنځ ترسره شوه. د لوبې پچه پاس صبر C لوبډلې وګټله او لومړی یې توپ وهنه وکړه. چې په ټاکلو ١٢ اورونو کې یې د شپږو ویکټو په زیان خپلې سیالې لوبډلې ته د ١٥١ منډو هدف وټاکه. پاس صبر B لوبډلې ټاکلی هدف د نهو ویکټو په زیان د لوبې په وروستي اور کې ترلاسه کړ او د یوې ویکټې په توپیر یې د سیالیو لومړۍ بریا خپله کړه.
دا سیالۍ د ځوانانو ترمنځ د یووالي په موخه پیل شوي دي، چې یوه میاشت به دوام وکړي.
