لوګر کې د ووشو ۴۰ استادانو ته د درېیم او څلورم درجه لایسنس روزنیز سمینار ترسره شو
د المپیک، بدني روزنې او ورزش عمومي ریاست اړوند د ووشو ملي فدراسیون له لوري په لوګر کې د ووشو ۴۰ استادانو ته درېیم او څلورم درجه لایسنس روزنیز سمینار ترسره شو.
د یاد سمینار پر مهال د لوګر ولایت د بدني روزنې او ورزش آمری انجنیر مزمل نعیمزي، د یاد ولایت د ووشو فدراسیون استازي سید نجیب الله هاشمي، د ووشو ملي فدراسیون سکرتر جنرال محمد خالد هوتک او د ووشو استادانو ګډون کړی و.
دغه سمینار د ووشو ملي فدراسیون سکرتر جنرال محمد خالد هوتک له خوا ترسره شو، چې استادانو ته یې پکې د دغې ورزشي رشتې د قوانینو په اړه لازمې لارښوونې وکړې.
دا سمینار د ووشو د استادانو د ظرفیت لوړولو په موخه ترسره شو، چې دوې ورځې یې دوام وکړ.
