هلمند؛ مرکز لښکرګاه ښار کې د ٢٠ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز لښکرګاه ښار کې د ٢۰ لوبډلو ترمنځ د ټېپ بال کرېکټ سیالۍ د آزاد لوبډلې په اتلولي پای ته ورسېدې.
د یادو سیالیو پایلوبه د امید ځوانانو او آزاد لوبډلو ترمنځ ترسره شوه. د لوبې پچه امید ځوانانو لوبډلې وګټله او لومړی یې توپ وهنه وکړه، چې په ټاکلو لسو اورونو کې یې خپلې سیالې لوبډلې ته د ١٣١ منډو هدف وټاکه. آزاد لوبډلې ټاکلی هدف د پنځو ویکټو په زیان د لوبې په نهم اور کې ترلاسه کړ او د پنځو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې یوه میاشت یې دوام وکړ.
