کابل کې د ۱۸۰ ورزشکارانو ترمنځ د طبما ټاکنیزې سیالۍ پيل شوې
د کابل ولایت د بدني روزنې او ورزش ریاست په همکارۍ د طبما رزمي هنرونو ملي فدراسیون له لوري د کابل ښار له ۱۶ کلبونو د ۱۸۰ ورزشکارانو ترمنځ د طبما ټاکنیزې سیالۍ پيل شوې، چې دوې ورځې به دوام وکړي.
دغه سیالۍ د تنکیو ځوانانو، نویو ځوانانو، ځوانانو او د لویانو ورزشکارانو په عمري کټګوریو کې پيل شوې، چې په پایله کې به ۹۰ غوره ورزشکاران د کابل ښار د طبما منتخبې لوبډلې ته وټاکل شي.
د دغو سیالیو په پرانیستغونډه کې د کابل بدني روزنې او ورزش رئیس مولوي عتیق الله خالد، د طبما ملي فدراسیون مسؤولینو، ورزشکارانو او زیات شمېر مینوالو ګډون کړی وو.
د یادو سیالیو موخه د کابل ښار د طبما منتخبې لوبډلې ته د غوره ورزشکارانو ټاکل او د ورزشکارانو ظرفیت لوړول دي.
