جوزجان کې د ۲۰ لوبډلو ترمنځ د فوټسال سیالۍ د جوزجان ځوانانو لوبډلې په اتلولۍ پای ته ورسېدې
د جوزجان ولایت د بدني روزنې او ورزش امریت اړوند د فوټبال ملي فدراسیون د استازولۍ له لوري د یاد ولایت په مرکز شبرغان ښار کې د یووالي جام په نوم د ۲۰ لوبډلو ترمنځ د فوټسال سیالۍ، چې یوه میاشت مخکې پيل شوې وې د جوزجان ځوانانو لوبډلې په اتلولۍ پای ته ورسېدې.
د دغو سیالیو په پایلوبه کې جوزجان ځوانانو لوبډلې خپلې سیالې کینګ اسپورت لوبډلې ته د ۳/۲ ګولونو په توپير ماتې ورکړه او اتلولي یې خپله کړه.
د یادو سیالیو موخه د ځوانانو ترمنځ یووالی رامنځته کول او د فوټسال لوبو ته وده ورکول و؛ د سیالیو په پای کې غوره لوبغاړو ته چمتو شوې ډالۍ ورکړل شوې.
