دایکندي کې د والیبال سیالۍ د شهرستان اتحاد لوبډلې په اتلولۍ پای ته ورسېدې
د دایکندي ولایت د بدني روزنې او ورزش امریت اړوند د والیبال ملي فدراسیون د استازولۍ له لوري د یاد ولایت په مرکز نیلي ښار کې د اتو لوبډلو ترمنځ د ولسوالیو جام په نوم د والیبال سیالۍ د شهرستان اتحاد لوبډلې په اتلولۍ پای ته ورسېدې.
د دغو سیالیو په پایلوبه کې شهرستان اتحاد لوبډلې خپلې سیالې الف مرکز لوبډلې ته د ۳/۲ میدانونو په توپیر ماتې ورکړه او اتلولي یې خپله کړه.
په دغو سیالیو کې وحید الله غوره لوبغاړی، سمیع الله غوره شوټر او رحمان قرباني غوره سنټر وپېژندل شول.
د یادو سیالیو موخه د والیبال لوبو ته وده ورکول او د غوره لوبغاړو موندل و، چې یوه نیمه اونۍ یې دوام وکړ.
