ننګرهار؛ دره نور ولسوالۍ کې د ١٤ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په دره نور ولسوالۍ کې د ١٤ لوبډلو ترمنځ د ټېپ بال کرېکټ سیالۍ د برګوټ مرکزي لوبډلې په اتلولي پای ته ورسېدې.
د یادو سیالیو پایلوبه د جبې زمریانو او برګوټ مرکزي لوبډلو ترمنځ ترسره شوه. د لوبې پچه جبې زمریانو لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د څلورو ویکټو په زیان خپلې سیالې لوبډلې ته د ٦٩ منډو هدف وټاکه. برګوټ مرکزي لوبډلې ټاکلی هدف د څلورو ویکټو په زیان د لوبې په شپږم اور کې ترلاسه کړ او د شپږو ویکټو په توپیر یې د دغو سیالیو اتلولي وګټله.
دا سیالۍ د ځوانانو د یووالي په موخه ترسره شوې، چې یوه میاشت یې دوام وکړ.
