هرات کې د ۱۶۰ ورزشکارانو ترمنځ د کیوکوشین کان کراټې سیالۍ ترسره شوې
د هرات ولایت د بدني روزنې او ورزش ریاست اړوند د کیوکوشین کراټې ملي فدراسیون د استازولۍ له لوري د یاد ولایت په مرکز ښار کې د ۱۶۰ ورزشکارانو ترمنځ په کانچو ماتسو شیما سبک کې د کیوکوشین کان کراټې څلور دېرشم پړاو سیالۍ ترسره شوې.
دغه سیالۍ د تنکیو ځوانانو، نویو ځوانانو او د ځوانانو ورزشکارانو په عمري کټګوریو او په بېلا بېلو وزني کټګوریو کې ترسره شوې، چې په پایله کې ۷۴ تنو ورزشکارانو د اتلولۍ مقامونه خپل کړل.
د یادو سیالیو موخه د کراټې ورزش ته وده ورکول، د هرات منتخبه سیالیو ته د ورزشکارانو لا ښه چمتووالی او د غوره ورزشکارانو موندل و، چې یوه ورځ یې دوام وکړ.
د سیالیو په پای کې د ورزش مسوولینو له لوري غوره ورزشکارانو ته کپ، مډالونه او د اتلولۍ حکمونه ورکړل شول.
