کابل کې د ۱۴۵۰ پهلوانانو ترمنځ د کابل ښار د پهلوانۍ ټاکنيزې سيالۍ پيل شوې
د کابل ولايت د بدني روزنې او ورزش رياست په مرسته د پهلوانۍ ملي فدراسيون له لوري د هېواد د ورزش ادارې په ۲۵۰۰ کسيز جمنازيوم کې د کابل ښار له پنځو زونونو څخه د ۱۴۵۰ پهلوانانو ترمنځ د کابل ښار د پهلوانۍ ټاکنيزې سيالۍ پيل شوې، چې دولس ورځې به دوام وکړي.
دغه سيالۍ د پهلوانانو ترمنځ د کابل ښار د پهلوانۍ منتخبې لوبډلې د ټاکلو په موخه په بېلابېلو وزنونو کې پيل شوي دي، چې په پايله کې به ۸۰ غوره پهلوانان د لوبڅارانو د پلاوو د تشخيص وروسته د کابل ښار د پهلوانۍ منتخبې لوبډلې ته وټاکل شي.
د يادونې وړ ده، چي د دغو سياليو په پرانيستغونډه کې د المپيک، بدني روزنې او ورزش عمومي رياست ورزشي مشاور او د پهلوانۍ فدراسیون رئیس قاري حيات الله رحماني، د المپيکي چارو رئيس داد محمد پاينده اختري، د کابل ولايت د بدني روزنې او ورزش رئيس مولوي عتیق الله خالد، د پهلوانۍ ملي فدراسيون د رهبرۍ غړو او ورزشکارانو ګډون کړی وو.
د يادو سياليو موخه د پهلوانۍ د برخې ځوانانو استعدادونو ته وده ورکول او د کابل ښار د پهلوانۍ منتخبې لوبډلې ته د غوره پهلوانانو موندل دي.
